START BIDPRENTJES PEY & OMSTREKEN LILBOSCH & PEY 40-45 FOTOCOLLAGE TEKSTEN GASTENBOEK INFO

TEKSTEN

Gebed van eine twiefelieër

Uit de bundel 'Knapkook"van Har Ramakers.

Hieër, zeentj Geer nog dao, hiebaove?
in Eur Riek, zoea groeat en wied.
Ich zoew gaernog aeve mit Uch wille praote..
Neet allein om Uch te laove
mer Geer witj : het is weer tied
Vastelaovesgekke sprènge door de straote..

Waat zal ich doon, Levenhieër?
Auch weer mit gaon deze kieër?
Ich zal mich hieël good haoje
aan Eur wètte...

Get aojhoore aan 't befèt
en auch opper tied nao bèd..
Zal ich den mien fieësnaas mer vas op gaon zètte?

Hieër, wiltj Gaer get helder spraeke?
Ich kan Uch bienao néét verstaon..
Jao, ich weit Hieër, woonsdig den begintj de Vaste..
zal ich den in die zès waeke
gaaroet gein kefee in gaon?
Hieël min aete; Hieër, det zeen toch hieël zwaor laste..

Jao, Geer zèktj Hieër, op gooj grunj;
'' Auch begeerte, det is zunj!"..
Det geldj aevegood väör erme, es väör rieke..

Waatväör väörnumes ich auch maak;
de wil is good... mer 't vleis is zwaak.
'Ich zal prebéére, nao gein anger vrouw te kieke...

Hieër, Geer höbtj òs wille lieëre;
'De mins laeftj neet van broead allein!
en dae teks höb ich bezunjer good verstange..
Mer Eur kènjer, det zee "hieëre"
zitte alles ongerein
blieve snachs nog waal èns gaer vriej laat oethange

Dökker weurtj 't half drie..
Ich bön der zelf verrekdes gaer biej
äövertraej ich daodoor
merkelik Eur wètte?..

Es ich dus good verstaon..
Höbtj Geer lever det ich nëët gaon..
Zal ich den mien fieësnaas mer weer aaf gaon zètte?..

Hieër, de sjäöp die Uch dit vraoge
zeen beslisj van gooje wil;
Geer höbtj zelf gezeen wie good die luuj zich baeje..
Raod van Èllef, de Vors, de Prins, die zitte väötaan in de riej...
Uch te ieëre en ech waor, neet zònger raeje...

Dank Uch Hieër, waat zeetj Geer good!
Nöttigheid zitj òos in 't blood
Mer weer zòlle hieël sjerp
op den duvel lètte..

En löptj 't mis; Vergaef òs Hieër
väör dae eine rotte kieër
noe weer väör drie daag òs fieësnaas op gaon zètte!!

Een idee om te lezen: "Eerste H.Mis Leo Hausmans"