Wie eine droum oetkoom
In ein klein wit huuske wone
Baerke en zien vrouw
Baerke stuitj väör de vinster
de vrouw bie de sjouw.
Baerke rouktj ‘n piepke
de vrouw kaoktj de pot
Baerke zaetj: ich gaon vèsse
de vrouw zaetj: och god!
He reep nog èns: ich gaon vèsse
en zie nog èns: auwieë.
Doe vroogter: vrouw waat is dich
höbse weer koppien?
Nae zaetj zie, ich bön zoea bang
det dich get gebäörtj
ich höb dees nach zoea akelig
äöver dich gedruimdj.
Ich zoog twieë vraemdje manslui
die droge miene man
väör doead de kamer bönne
Ich sjròk der wakker van.
Ich huuërdje de ule kratse
en nach zo’n raar geroes
nae, ich bön neet biegeluivig
mer ich raoj dich toch, blief thoes.
Doe bös neet biegeluivig
mer zòts ’t waere vrouw
es ich vandaag diene zin deej
en daoròm gaon ich gauw.
Het waer is good om te vèsse
ich wèd det de baars good bietj
ich kom mit ei nèt vol
trök väör aetestied.
Baerke pakdje zien gaert
en zag : tòt straks, daag saam
de vrouw kòs niks zègke
En keek ‘m nao door de raam.
’t Woor aetestied, ’t woor aovendj
de vrouw bleef allein
’t hert, ze kòs ‘t veule
kròmp van angs inein.
Ze leep door ’t hoes te lemmentere
haw der mer miene zin gedaon
dae is zeker verdrònke
dao is geine twiefel aan.
Dao huuërtj ze boete loupe
God dank dao zòtse ‘m höbbe
Twieë manslui valle lachendj
De klein kamer bönne.
Hie höb geer noe , vrouw
’n pimpelzootje eure man
Hè is zoea bezaope, detter
gein voot verzitte kan.
