START BIDPRENTJES PEY & OMSTREKEN LILBOSCH & PEY 40-45 FOTOCOLLAGE TEKSTEN GASTENBOEK INFO

TEKSTEN

De käöninklikke sjènking

Echt, 25 oktober 1969. Bie de äöpening van de Nuuje Waeg (Brugweg Pey) Waarsjienlik gesjreve door René Geurts

Van Söstere troch Käöning Pepien nao Berg
In de reiswage woor daen aafstandj neet erg.

Hae ging mit Odilia, ze woor benao blèndj
Sint Wiro zoew waal genaeze ziej leef kèndj.

Äöver de Hómmelheij, 't Rötsekaove en langs 't Bolvèn,
Dao woor de gròndj nog hèl wie einen dén.

Mer wiej der woor getroch door 't Paterslandj
Dao stóng der aane Piael häöre naate kantj.

Pepien zoog waal den Häövel aan d'anger ziej,
Dao leep d'n aoje Romeinse haerwaeg aan verbiej.

De Romeine , diej maakdje väör hun soldaote dei baan,
Die leep van Tuddere rech door de Bos op Miaelik obbaan.

Mer dao woor väöl raenge gevalle det jaor,
Het Brook woor erg zòmpig, de rajer leepen al zwaor.

En wie Pepien zich waogdje äöver den diek
Dao stónge de paerd van de sjrik obbèns stief.

En de wage zakde weg inne zómp
En haos loog het gevaers mit alles der in óm.

Dao woor de käöning Pepienus in nuaod:
Wegzakken in 't Brook...? 't gevaor woor gruaod.

Doe bloos eemes vanne liefwach, het waas huaog tied
Op zien ossejaore dettet klònk wied en zied.

Det huuerdje de minse van Ech inne bos en oppet veldj
Ze kome op de nuaodklank gaw aangesneldj.

Ze pakdje mit hun knoeste de rajer stevig vas
En trochte..en trochte...de wage oeten dras.

Ze lagte doe ein brök van buim en dikke tek
Die boere van Ech, Pej en auch diej vanne Slek.

Ze stónge nog te zweite midden in 't Brook,
Wie käöning Pepien dees 'wäörd tòt hun sprook:

En hae strèkdje zien erm doe wied oetein
En wees nao alle kénj van zien oetgestriktj domein.

"Deze Piael, zwao wied es ger mer kieke kòntj
Mitte bös aan weersziej oppen huaoge gròndj

Dit allemaol sjènk ich uch es eine luaon
Väör al waat ger hiej väör mich höbtj gedaon

Ten iaewigen daag blif dit eur gezamelik bezit
Zwao lang nog eine mins in dees geméndje zit...

En dènktjer good aan, geer minse van Ech
Bliftj, waat ouch gebäörtj, staon op eur rech

Laot geine vraemdje aan dit käöningsgood draan"
Doe vervolgdje hae ziene waeg op Berg obbaan.

Hae reej wiejer, nog lang nao gestaardj...
Mer die van Ech höbbe zien wäörd altied bewaardj.

Den Echterbos en 't Echterbrook woor den dank
Van de rieke käöning Pepien, dae machtige Frank.

Noe löptj äöver diej brök ein nuuj baan.
Geer diej hiej langskòmpt, dènktj nog èns traan.

Mit väól geldj en väöl metje wòrdt die tot standj gebrach
Haw dae käöning Pepinus dèt uaots gedach?

R.G.

Een idee om te lezen: "Boesten"