START BIDPRENTJES PEY & OMSTREKEN LILBOSCH & PEY 40-45 FOTOCOLLAGE TEKSTEN GASTENBOEK INFO

TEKSTEN

Anekdotes

Korte verhaaltjes of onderwerpen uit mijn kinderjaren Oppe Baek.

1) Miene pap woondje op de Hoeagstraot taege äöver Drikske van Anteunke. Eine echte aoje vriegezel en dörpsfiguur. Drek väör zien awd huuske stong eine groeate noteboum. Es Drikske get mòs,beväörbeeldj wete wie laat 't woor of eine knoup urges aan genieëtj, ging der nao Nel ( pap zien moder). Dao woorse bure väör. Mer hae drònk zich aug waal 'ns eine gooje en den kòster lestig zeen. Det wiste pap en zien breurs auch en geer kèntj begriepe det zo'n jong buujele auch waal 'ns ströbbestreek oet häöle.Taege zo'n streek kòs Drikske den neet taege en den stong der in de däór van zien huuske te kwake: "Achter dae noteboum zit ein nés gekke"


2) Drikske haw eine hòndj "Bruno", 'nne groeate broene mit krölkes, dae oot waat de pot sjafdje en det zal neet op geregeldje tieje zeen gewaes.
Es Drikske aan de taofel zoot te aete, stong Bruno te grantje, want dae verrèkdje natuurlik van den hònger. Den stook Drikske eine aerpel op zien versjèt en goeadje, zonger te kieke dae aerpel achter zich.  Geer kèntj uch väör stèlle waat achter 'm oet woor.


3) Pap en Mam krege in 't begin van de fieftiger jaore 't aojershoes van mam oppe Baek, de sjroeapstäökerie. Vader, de pap van mam, woondje bie òs in wie det in die jaore gebroekelik woor. Oppe haof  loog langs de zie-gevel 'n breij riej kènjerköpkes en de res woor drek en anger aanvölsel. Pap haef doe zelf plèveuze gemaakj en die op den haof gelagtj same mit ome Doear. Wie ze dao ongevieër mit klaor wore koom Pieër de miejemoes langs en zaetj taege de sjroeapstäöker ; "Doear , det kosj  klòmpe".


4) Oppe Baek, det woor ein groeat awd gezellig aojershoes mit väöl kamers en kaemerkes in alle maote. Baove hadse 6 slaopkamers . Nouw slaopkamers?  Zoea woor der de moezekamer, ein kaemerke de deens dee es opslaag väör inmaak en dao stong de sjòngkekas.Op dit kaemerke ,det aan d'n hòf kantj loog,hadse de hoofzekering van de gemèndje zitte in ein iezere aansloet-kestje. De lektreskabel koom van väör ane straotkantj tòt hie en ging den nao de sjuur, wo achter de pòrt de  zekering en de maeter hòng.   Den hadse de gaaskamer, dao leep de sjouw van de käöke door.  Die sjouw haw èns in de fik gestange, die blösdje ze mit ein brandslang en dao kòste de geleuj heite stein neet taege en spronge.  Esse de stoof stäökdje roukdje de sjouw neet oppe taak mer oppe slaopkamer.  Den de slaopkamer van pap en mam en die haw get apaars.  Es weer good krank wore, moogdje weer biej pap en mam in bèd en äöverdaag mit ein fles Exota, want esse krank woors mòsse good drènke en röpse. Doe woors bie òs gaer krank.  Den de slaopkamer van Jan , Wim en mich.  Ein kamer mit ein spaarlempke in ein groeate lampekap mit figure d'r op die door det zwaak lempke spoeakechtig äöver kome.  Ein groeat houte bèd mit plenk woo-op eine struuëzak. Es de stuuëzak op 't ènj van de zomer opnuuj gevöldj woor, mosse dich de ieëste nachte good haoje, anges toemeldje se droet. Die plenk flikkerdje geregeldj oppe gròndj en den kòs pap weer 'n paar stein stapelle. Die stein loge toch onger 't bèd, tewachte oppe wèntjer, want den ginge die d'n aove in en den goot heit ane veut in 't bèd.  Väörzichtig väör blaore en esse aafgekeuldj waore väör 't vel.  Aeve good stòng in de wènter es 't vroor, s'mörges het ies op de daekes. Den hawwe wer nog ein appelekaemerke baove woo de appele bewaardj waerdje en ein kamer mit ein döbbel houte vloer, waal ein rotte vloer.  Op die kamer moogdje weer, wie wer klein wore, neet aanne vinster kòmme, want dao kòsse de lektresdräöj ane gevel zoea vas pakke en det koom zeker doordet ze de twieëdje vloer aöver de ieëste aoj gelagdj hawwe en dus 35 centemaeter hoger loog. Drie slaopkamers hawwe gewuuën vinstere inne gevel en die anger drie hawwe klein daakvinsterkes. 't Mòs neet te hel raegene en wejje , want den kòste die waal 'ns laeke. Onger woor nach de slaopkamer van vader, ein groeate kamer väör ane straot, ein gengske, ein käöke, de trap mit eine doorgangk nao de kamer achter, oos woonkamer mit de radio hoeag op ein sjaepke en eine aarddraod d'r aan, de gank, de käöke, wose esse aan de moer kòms woo de kraan woor, eine flinke slaag van de stroum kreegs. Alle moere wore paeperkook. Kèntj geer uch väörstèlle det pap in 1963 de slopershamer d'r in zat?  Achter de,  in cemènt gezadje gevel, koom mit aafbraeke eine gevelstein teväörsjien mit 't jaortal 1726.  Toch haw det hoes get.


5) D'n aoje sjroeapstäöker woor neet vies van eine borrel. Mit ziene verjaordaag of mit Sinterklaos, kreeg der van de meiste kènjer ein fles snaps. Die zatter den allemaol op zien slaopkamer inne kleijerkas. Ein glaeske songer veutje stong den òmgedrejd op de dop. Mer det glaeske haw der neet nuuëdig,  hae heel waal d'n doem tot wie wuut hae moogdje drènke. Allein jaomer det dae doem niet de plaats aan goof woo der hem in 't begin neer zat. Zoea lang der get in dae kas haw staon, mòster gotweit wie dök op zien slaopkamer zeen, wo der anges allein mer koom òm 's aoves in bèd te kroepe.


6) Es ter èns bie ein van zien kènjer mòs zeen, sjödje die 'm eine borrel in.  Behalve op ein plaats, dao kreeg ter altied ein tas kòffie. Ester dèn heim kòm woor 't ieste waatter zag; An, gaef mich ein fètsuunlikke tas kòffie, want det goof mich weer get oet ein pötje. (waarschienlik Buisman).


7) 's Zondigs ging der, nao de H. Femielje in de naomiddig, mit ziene buurman Maantje Bekkers eine drènke.
Esse den heives komme en bie Maantje ònger de lènje-buim stonge te klasjenere, zag mam dökker ; aojuij , die höbbe den hood weer in de nak. En ester de hood inne nak haw gatj en wèr zote 's aoves aan de taofel, vertèldje hae altied verhaole en meistal van juffrouw zonderkop.


8) Greunte en fruit oter volges zien kènjer neet genòg.  Geer mòtj vitamine bönne kriege.  Den zag der; Geer mit eur vètte miene.


9) Pap woor op 't spaor. 's Wènters es 't sniedje en det woor meestal 's nachs, hawwe ze snieë-deens ( de wissels snieë vrie make). Weer hawwe in die jaore geine tillefoon ( waem waal) . Graad van Keuëbke oppe Slek dae wis altied det ze mòste gaon en den stong dae erme mins mit keezelkes taege de slaopkamerraam te goeaje òm pap wakker te kriege. Hè de vot inne, want det haadje hae en Graad kreeg ze dròm. Kòs dae toch auch niks aan doon det 't wènter woor. Van wirke woor pap neet vies, mer 's nachs mosse hem mit rös laote. Weer stònge 's mòrges hem op te wachte, want esse snieë-deens hawwe   krege ze eine pot ertesop. De meiste ote dem ònger 't werk op, mer pap brag dem altied mit heives väör òs.


10) Es eine van òs vroog nao emes, zag mam meistal;  Gradus woo's Nadus?  Kakke, menieër pestoear.


11) Dae mit dae bolhood, det waar der. Dae vroot mich de ganse broen bebbelkes op.                                   ( Broen bebbelkes woore broead snoepjes) 


12) Wie laat is het? Kappes menieër. Ein jungske geit heives aete en kömpj emes taege dae 'm vraogtj wie laat het is. Det menke woor zoea mit det aete bezig detter neet wis waatter zag.


13) Vroogse emes waat get gekôsj haw en dae haw dao niks mit te make, kreegse meistal es antwaord : Geldj, aerpelesjèlle woolle ze neet!


14) Esse ein tant of maedje zoge waat de lupkes flink roead haw, kreegse de opmerking: Die haet eine haan de kop aafgebeete.


15) Esse emes taege kome dae lestig woor; es dae ein paar jaor aojer is, kòmme ze 'm 't voor vaor aan sjuive mit de reek en den bitj ter nag inne steel.


16) Emes dae zich goot gelaaje haw mit aete; mit dem zien maag geitj de kat neet slijpe.


17) Ich haw gaer,den kreegse te hueëre: Wiej ze de hejje hawwe, wore de höbbe duur.


18) Es ich dit of es ich det: Es oos kat ein koe woor, goof oos kat mèlk.


19) Eine dae zich get mèndje en hieël gruets leep: Dae löptj of d'r de waereld in pach haef.


20) Eine echte Pejjer haef altied 'n kniep in de tes en eine zuivere tesseplak.


21) Graad stuitj 's mörgesvreug op, duitj de gerdiene aope, zuutj det 't raegendj en zaetj taege zien vrouw: Merie, kroep mer weer trök, 't geuf eine aovesraegen.

 

 

 

Een idee om te lezen: "Kapel op de Slek met gedicht"